Тошкентда 2 та автомобиль ЙТҲга учради
Оқибатда 2 киши шифохонага ётқизилган.
Кеча, 14 май куни Тошкент шаҳрининг Юнусобод туманида иккита автомобиль иштирокида йўл-транспорт ҳодисаси содир бўлди. Бу ҳақда шаҳар ИИБ ахборот хизмати хабар берди.
Қайд этилишича, воқеа Амир Темур ва Боғишамол кўчалари кесишган чорраҳада юз берган. Унда 1997 йилда туғилган Х.О. бошқарувидаги “Спарк” русумли ва 2000 йилда туғилган А.Б. бошқарувидаги “Кобальт” русумли транспорт воситалари ўзаро тўқнашган.
Ҳодиса оқибатида “Спарк” ҳайдовчиси ва ундаги 21 ёшли йўловчи М.М. тан жароҳатлари билан шифохонага ётқизилган.
Ҳозирда ЙТҲ сабаблари ўрганилиб, ҳолат юзасидан Тошкент шаҳар ИИББ ЙҲХБ томонидан суриштирув ўтказилмоқда.
