Ўзбек–қирғиз чегарасида 9 киши вафот этди
Ҳолат юзасидан ИИВ маълумот берди.
Ўзбек–қирғиз чегарасида 12 та автомобиль иштирокида йўл-танспорт ҳодисаси содир бўлди. Бу ҳақда ИИВ ахборот хизмати хабар берди.
Қайд этилишича, воқеа бугун, 21 май куни соат 15.30 атрофида “Чашма” чегара ўтказиш пунктида юз берган. Қирғиз Республикаси Баткен вилояти Қадамжой тумани орқали Ўзбекистон Республикасининг Сўх тумани ҳудудига ҳаракатланиб келаётган, устига бульдозер юкланган бўлган трейлер автотранспортининг тормоз ускунаси ишдан чиқиб, ҳайдовчиси бошқарувни йўқотган ва рўйхатдан ўтиш учун навбатда турган жами 12 та (2 та Ўзбекистон ва 10 та Қирғиз Республикаси) автомашиналарга урилиб, уларга шикаст етказган.
Ҳодиса оқибатида 9 нафар фуқаро (шулардан, 1 нафари Ўзбекистон Республикаси, қолган 8 нафари Қирғиз Республикаси фуқароси) вафот этган.
Ҳозирда ҳолат юзасидан терговга қадар суриштирув ишлари олиб борилмоқда.
