Чирчиқда мактаб ўқувчилари 58 ёшли эркакни бесабаб калтаклади
Ҳозирда мазкур ҳолат юзасидан терговга қадар текширув ўтказилмоқда.
Ижтимоий тармоқда Тошкент вилояти Чирчиқ шаҳрида икки нафар мактаб ёшидаги бола 50-60 ёш орасидаги эркак кишини ҳақорат қилиб, урганлиги акс этган видеолавҳа тарқалди. Ҳолат юзасидан вилоят ИИБ ахборот хизмати расмий муносабат билдирди.
Қайд этилишича, воқеа 2022 йил 21 май куни соат 17:30 атрофида содир бўлган. 2007 йилда туғилган икки нафар 8-синф ўқувчиси Н.Л ва Э.А. жамиятда юриш туриш қоидаларини қасддан менсимасдан, одоб-ахлоқ номаларига зид равишда Чирчиқ шаҳар 4-кичик ноҳия ҳудудида 58 ёшли Р.А. ни ҳеч бир сабабсиз уриб, безорилик қилган.
2008 йилда туғилган А.Н. (7-синф ўқувчиси) мазкур жараённи уяли алоқа воситасида видеотасвирга олган. Кейинчалик видеолавҳа ижтимоий тармоқларга тарқатилган.
ИИБ масъул ходимлари ушбу ўқувчилар яшовчи маҳаллага бориб, келгусида бу каби ҳолатларнинг олдини олиш мақсадида маҳалла аҳли, уларнинг ота-онаси ва кенг жамоатчилик иштирокида муҳокама ўтказган.
