ДТМ диагностик тест хизматини тўхтатади
Бу ОТМга кириш имтиҳонларига оз вақт қолгани билан изоҳланди.
Эртага, 30 май куни соат 10.00 да my.dtm.uz сайти орқали диагностик тест материалларига буюртмаларни қабул қилиш якунланади. Бу ҳақда Давлат тест маркази расмий каналида маълум қилинди.
Қайд этилишича, тест синовларига қисқа вақт қолгани сабабли Давлат тест маркази иш фаолиятидан келиб чиққан ҳолда диагностик тест хизматини тўхтатиш зарурати юзага келган.
Бунда э-ДТМ тизими ишлашда давом этади ва талабгорлар @e_dtm_bot телеграм боти орқали тест материалларига онлайн буюртма беришлари мумкин бўлади.
Эслатиб ўтамиз, ДТМ томонидан жорий йил бошида олий таълим муассасаларининг бакалавриат таълим йўналишларига кириш тест синовлари форматидаги диагностик тест хизмати йўлга қўйилган эди. Мазкур хизмат доирасида талабгорларнинг билими синовдан ўтказилади ва улар тест материаллари билан ишлаш кўникмасига эга бўлади.
