Ёзувчилар уюшмасида журналистнинг жонли эфир вақтида залдан чиқариб юборилгани бўйича муносабат билдирилди
Маълум қилинишича, журналистнинг тадбир фонида интервью олиши маърузачига халақит берган.
Жорий йилнинг 30 май куни Ўзбекистон Ёзувчилар уюшмасида Эркин Воҳидов хотирасига бағишланган тадбирни жонли эфир орқали ёритиб бораётган журналист суҳбатдошдан интервью олаётган вақтида залдан чиқариб юборилганди. Мазкур ҳолат юзасидан Уюшма раиси Олимжон Ўсаров муносабат билдирди.
Маълум бўлишича, мазкур тадбирни “Маданият ва маърифат” теканали орқали тўғридан-тўғри эфирга узатилган. Журналист Дилрабо Акромова тадбирни тасвирга тушириш жараёнида залдаги бир неча иштирокчилардан суҳбат ёзиб олишга ҳаракат қилган. Дастлабки суҳбатни ёзиш чоғида маърузачига бу ҳолат таъсир қилган ва унинг эътирозига сабаб бўлган.
Журналист томонидан иккинчи суҳбатдош чақирилиб, суҳбат ёзиб олинаётган жараёнда эса Эркин Воҳидовнинг қизи Фозила Воҳидова томонидан улар залдан чиқариб юборилган.
Таъкидланишича, халқаро амалиётда интервью олиш жараёни алоҳида белгиланган жойда, яъни махсус баннер ёки шу тадбирни акс эттирувчи фонда (асло тадбир залида эмас) амалга оширилади.
“Бизнинг тадбирларда телевидение вакиллари таклиф қилинади. Лекин уларнинг ишлаши учун махсус жой ажратилмайди. Шунинг учун бир жуда кўп эътирозларнинг гувоҳи бўламиз. Хулоса қилиб айтганда, тадбирларда журналистларнинг, айниқса, фотожурналист ва телеоператорларнинг бемалол тасвирга туширишлари учун имкон яратиб бериш керак”, — дейди Олимжон Ўсаров.
