Тошкентда Матиз дарахтга урилиши оқибатила 2 киши ҳалок бўлди
Ҳодисага ҳайдовчининг тезликни оширгани сабаб бўлган.
Тошкент шаҳрининг Яккасарой туманида 7 июнь куни Матиз иштирокида йўл-транспорт ҳодисаси содир бўлди. Ҳолат юзасидан шаҳар ИИББ маълумот берди.
Қайд этилишича, автоҳалокат шу куни соат 04:00 атрофида Яккасарой тумани Бобур ва Шота Руставели кўчалари кесишмасида юз берган. 1989 йилга туғилган ҳайдовчи Б. А. Матиз русумли автомашинада ҳаракатланиб, тезлик оқибатида руль бошқарувини йўқотган ва транспорт воситаси йўл четидаги дарахтга урилган.
Ҳодисадан сўнг автомашина ҳайдовчиси ва унинг йўловчиси (2000 йилда туғилган фуқаро) З. К. тан жароҳатлари олиб, воқеа жойида вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 3-қисми билан жиноят иши қўзғатилди.
