Италияда маймунчечак инфекциясини юқтирганлар 70 нафардан ошди
Бу ҳақда мамлакат Соғлиқни сақлаш вазирлигининг касалликлар профилактикаси департаменти раҳбари Жованни Резза маълум қилди.
Италияда ҳозиргача 71 кишида маймун чечак инфекцияси аниқланган.
«Аслида, улар кўп эмас, лекин тарқалиш ошмаслигини таъминлаш муҳим ва бунинг учун оддий тавсияларга амал қилиш керак», дейди Резза. Шунингдек, у касалликнинг белгилари икки-уч ҳафта ичида пайдо бўлиши ва ўчоқлари географик жиҳатдан чекланганлигига эътибор қаратди. Унинг қўшимча қилишича, симптомлар тошма ва баъзи ҳолларда иситма, мушакларнинг оғриғи ва чарчоқдир.
Аввалроқ Жаҳон соғлиқни сақлаш ташкилоти (ЖССТ) маймун чечак вируси тарқалишининг глобал хавфини баҳолаш учун фавқулодда қўмитани чақириши маълум бўлган эди. Ушбу йиғилиш 23 июнга белгиланган. Ташкилот бош директори Тедрос Гебрейесус аввалги авж олишларга нисбатан инфекциянинг ҳозирги версияси ўзини ғайриоддий тутишини, шунинг учун вирусологлар бунга алоҳида эътибор қаратишлари кераклигини қайд этди.
