Ўзбекистонда ошқовоқ ва маккажўхоридан шарбат ишлаб чиқарилмоқда
У бир қатор касалликлар учун шифобахш ҳисобланади.
Тошкент вилоятидаги “Healing Herbs” МЧЖ корхонасида Ўрта Осиёда ягона бўлган маҳсулот тури, яъни ошқовоқ ва маккажўхори бўтқасидан табиий шифобахш шарбат ишлаб чиқариш йўлга қўйилди. Бу ҳақда Қишлоқ хўжалиги вазирлиги Матбуот хизмати хабар бермоқда.
Ушбу табиий шарбат доривор ҳисобланиб, биринчи навбатда инсон иммунитетини кўтаради, жигар, ошқозон, қон томирларидаги холестерин моддасини ювади ва бошқа бир қатор касалликлар учун шифобахшдир.
Ушбу корхона Хитой технологиялари асосида ташкил этилган бўлиб, 2021 йил декабрь ойида ишга туширилган. Корхона бир кунда 80 минг дона, бир ойда 2,4 млн дона, бир йилда эса 28,8 млн дона тайёр табиий шифобахш шарбат ишлаб чиқаради. Бунинг учун 1000 тонна ошқовоқ ва 300 тонна маккажўхори сўтаси талаб этилади.
Ҳозирги кунда Ўрмон хўжалиги давлат қўмитаси тизимидаги ташкилотлар томонидан 400 гектар майдонда ошқовоқ ва маккажўхори экинлари экилган ва ҳосилини корхонага етказиб бериш режалаштирилган.
Шу билан бирга, корхона қишлоқ хўжалиги маҳсулотларини қайта ишлаб, Туркия ва Россия давлатларига экспорт қилиш учун шартнома имзолаган.
