Мактаб дарсликлари ҳозирча бепул бўлади—Темур Комилов
Келгуси йилги дарсликлар ижараси юзасидан вазир ўринбосари изоҳ берди.
Аввалроқ Президент бошчилигидаги видеоселектор йиғилишида мактаб дарсликлари ва машқ дафтарларини бепул ижарага беришни тезкор йўлга қўйиш юзасидан топшириқ берилганди.
Бу амалиёт ҳар йили татбиқ этиладими? Ушбу саволга халқ таълими вазири ўринбосари Темур Комилов матбуот анжуманида жавоб берди:
“Давлат бюджети тўғрисида»ги Қонунга кўра, китоб жамғармаси бюджети тасдиқланган. Унга кўра, 2022-йилда китоб чоп этиш учун 1,1 трлн сўм кўзда тутилган. Шундан 605 млрд сўм давлат бюджетидан йўналтирилади, қолгани Бюджетдан ташқари Республика мақсадли китоб жамғармаси маблағлари ҳисобидан қопланади.
Қонунчиликка кўра, ушбу Жамғарма маблағлари ижара тушумларидан шаклланиши белгиланган. Жорий йилда 500 млрд сўм ижара тушумидан қопланиши керак эди.
Президентимизнинг инсон қадрини улуғлаш, аҳолига енгиллик яратишга қаратилган эзгу ғоялари асосида бу йил дарсликлар бепул бўлди. Бу нима дегани? Яъни, ижара тушумидан шаклланиши — ота-оналар тўлаши керак бўлган 500 млрд сўмга яқин пул давлат бюджетидан тўлаб берилади.
Мактаб дарсликлари ҳозирча фақат бу йил учун бепул бўлади. Кейинги ўқув йиллари учун дарсликларнинг бепул бўлиш-бўлмаслиги комиссия ўрганишларидан кейин маълум қилинади”.
