Зойир Мирзаев “Корея – Марказий Осиё” ҳамкорлик Форуми котибияти ижрочи директори билан учрашди
Учрашувда Бўка туманида жойлашган “Buka Sports wear” корхонасини кенгайтириш, ишлаб чиқариш ҳажми ва маҳсулот турини кўпайтириш масаласи ҳам атрофлича муҳокама қилинди.
Тошкент вилояти ҳокими вазифасини бажарувчи Зойир Мирзаев бошчилигидаги вилоят делегацияси Сеул шаҳрида ўтётган “Корея – Марказий Осиё” 14-ҳамкорлик форумида иштирок этмоқда.
Делегация форумнинг илк кунида “Корея – Марказий Осиё” ҳамкорлик Форуми котибияти ижрочи директори билан учрашди.
Унда Ўзбекистон минтақадаги энг муҳим стратегик ҳамкор эканлиги, шунингдек, сўнгги йилларда икки мамлакат раҳбарлари ўртасидаги илиқ муносабатлар давлатларимиз ўртасидаги алоқаларнинг жадал тарзда ривожланишига туртки бўлаётганлиги таъкидланди.
Жумладан, Корея томони ҳозирда Ўзбекистонда доривор ўсимликлар, медицина, балиқчилик ва саноатни ривожлантириш соҳаларида лойиҳаларни амалга ошираётгани ҳақида маълумот бериб ўтди.
Тошкент вилояти ва Кёнгсанбук-до провинцияси ҳамда Кореянинг бошқа вилоятлари ўртасидаги ҳамкорликни янада мустаҳкамлаш йўлида Котибият томонидан келажакда ҳам тегишли ишлар олиб борилишига алоҳида урғу берилди.
Хусусан, томонлар Бўка туманида жойлашган “Buka Sports wear” корхонасини кенгайтириш, ишлаб чиқариш ҳажми ва маҳсулот турини кўпайтириш, бунинг учун қўшимча тўғридан-тўғри инвестиция киритиш масаласини атрофлича муҳокама қилишди.
