Талабаларимизни хафа қилдирмаймиз—Шерзодхон Қудратхўжа
ЎзЖОКУ ректори 1-босқич талабасининг ИИБга чақирилгани бўйича муносабат билдирди.
Аввалроқ ижтимоий тармоқларда аёл киши талаба-қизларни ижара уйидан ҳайдаб чиқараётгани ва ижарага кўпроқ пул тўлайдиган бошқа мижозларни жойлаштирмоқчи экани акс этган видео тарқалганди.
Ҳолат юзасидан Ўзбекистон журналистика ва оммавий коммуникациялар университети расмий муносабат билдириб, мазкур видео университетнинг 1-босқич талабаси томонидан ижара уйларнинг нархи кўтарилиши юзасидан саҳналаштирилган видеоси эканини маълум қилганди.
Бироз вақт ўтиб, Тошкент шаҳар ИИББ роликни суратга олган 1-курс талабасини топиб, у билан профилактик суҳбат ўтказилгани бўйича маълумот берди. Талаба суҳбат давомида видеони суратга олишдан мақсад обуначи кўпайтириш эканини, видеодаги воқеалар саҳналаштирилгани ҳақида эса ҳеч қандай изоҳ ёзмаганини тан олиб, қилган иши учун узр сўраган.
Шундан сўнг ҳолатга Ўзбекистон журналистика ва оммавий коммуникациялар университети ректори Шерзодхон Қудратхўжа ҳам ўз муносабатини билдириб, Facebook саҳифасида пост қолдирди.
“Талабага биз таълим берамиз, унга касбий маҳоратга эга бўлиш ва комиллик йўлларига чиқишида Устозлик қиламиз!
Кеча мактабни битириб келган ўспирин болани 4-6 йилда “проффи” қиламиз. Яхши бир кадр тайёрлаш учун кўпгина профессорлар, доцентлар, амалиётчилар машаққатли меҳнат қиладилар. Демакки уни койишга, устозлардек насиҳат қилишга хаққимиз бор.
Аммо нечун талабанинг професссионал фаолияти учун биздан ўтиб, биздан дегани — кафедра, деканат, тюторлар, ректоратдан сўрамай, ички ишлар идораси, ё бошқа идораларга “профилактик суҳбат” учун талабамизни чақиришади? Нима учун буни видеога олиб, ролик қилиб ижтимойи тармоқларда тарқатишади? Нимага “узр” сўрашга мажбурлашади, юзини ҳаммага кўрсатиб?
Эски замонлар энди қайтмаслигини билишсин ўшалар. Ё эпласалар, келиб дарс беришсин.
Эртага бу масала билан шахсан ўзим шуғулланаман, қисқа муддатли ишда бўлмаганим афсус панд берди. Талабаларимизни хафа қилдирмаймиз, ўзимиз таълиму-тарбия беришга қодирмиз, ўзимиз яхши иш билан таъминлаймиз!
“Чумчуқ сўйсаям қассоб сўйсин” бекорга дейишмагин оқилларимиз”, — дейди ректор.
