Мактабда ўқитувчиларга қандай ҳаракатларни қилиш тақиқланади?
Ўқитувчи ўқувчига ўрнак бўлиши керак. Бола мактабдаги илк таълим билан бирга одоб-ахлоқни аввало ўқитувчисидан олади, унга тақлид қилади.Ўқитувчининг ҳар бир дарси ўқувчи учун занжир ҳалқаларидек ўзаро боғлиқ. Мабодо ўқитувчи бир соат дарсини қолдирдими, тамом. Билим деган пойдеворга дарз кетади. Ўша занжир узилиб қолади. Кейин соатлаб дарс ўтадими, қўшимча сабоқ берадими, фойдаси йўқ. Шу боис ҳам ўқитувчи хатога йўл қўймаслиги керак.
Халқ таълими вазирлигининг 2022 йил 28 июлдаги 246-сонли буйруғи билан “Умумий ўрта таълим муассасаларининг ички тартиб ва одоб-ахлоқ қоидалари” тасдиқланган.
Унга кўра, мактабда ўқитувчиларга қуйидаги ҳаракатларни қилиш тақиқланади:
👉жамоа аъзолари ва бошқаларнинг шахсиятини, қадр-қимматини камситиш, руҳий ва жисмоний зўравонлик кўрсатиш;
👉ўқувчиларни дарс машғулотларидан асоссиз чиқариб юбориш ёки киритмаслик;
👉“Чиқиш” қўнғироғи чалингандан кейин ўқувчиларни синфхонада ушлаб ўтириш;
👉таълим муассасасига ва дарс машғулотларига спиртли ичимликлар истеъмол қилган, соч-соқолни тартибга келтирмаган ва кийиниш одобига риоя қилмаган ҳолда келиш;
👉таълим муассасаси ҳудуди ва биносида спиртли ичимликлар ва тамаки маҳсулотларини истеъмол қилиш;
👉муассаса ҳудуди ва биносида ўқувчиларнинг таълим-тарбиясига алоқаси бўлмаган турли хил тадбирлар (туғилган кун, юбилей, ифторлик ва бошқа тадбирлар билан боғлиқ байрамона дастурхонлар)ни ташкил этиш;
👉таълим муассасасида ўтказиладиган барча тадбирлар ва уларга тайёргарлик ишларини дарс машғулотлари вақтида ўтказиш.
Тўлқин Жуманов ва Ёқутхон Азимова,
Бектемир туманидаги 293-мактабнинг Маънавий-маърифий ишлар бўйича директор ўринбосарлари
