Қирғиз—тожик чегарасига КХШТ кучлари жойлаштирилиши мумкин
Бу ҳақда Қирғизистон Мудофаа вазирлиги маълум қилди.
Қирғизистон Тожикистон билан чегарадаги вазиятни юмшатиш мақсадида яқинда можаро кузатилган ҳудудга КХШТ ҳарбий контингентини жойлаштиришни мақсадга мувофиқ деб ҳисоблайди. Бу ҳақда Бишкекдаги матбуот анжуманида Қирғизистон Мудофаа вазирлиги раҳбари Бактибек Бекболотов маълум қилди.
“Икки давлат ўртасида ҳакам турмагунча чегарада тинчлик ва осойишталик бўлмайди. Техникаларни олиб чиқиб кетиш ва ўт очишни тўхтатишни назорат қилиш учун баҳсли ҳудудларга КХШТнинг кичик контингенти жойлаштирилиши мумкин”, — дейди Бекболотов.
Унинг сўзларига кўра, Душанбе билан баҳсли ҳудудлар бўйича консенсусга эришиш анча қийин бўлади, чунки ҳар бир томоннинг “ўз ҳақиқати” бор. Вазирнинг қўшимча қилишича, Қирғизистон—Тожикистон чегарасида КХШТ ҳарбийлари пайдо бўлганидан кейингина чегарани демаркация ва делимитация қилиш жараёнини давом эттириш мумкин бўлади.
