Ўзбекистон — Озарбайжон диний идоралари ўртасида меморандум имзоланди
Учрашувда икки давлат раҳбарларининг диний-маърифий соҳага қаратаётган алоҳида эътиборлари натижасида кўплаб хайрли ишлар амалга оширилаётгани таъкидланди.
Ўзбекистон мусулмонлари идораси Матбуот хизмати хабарига кўра, кеча, 19 октябрь куни Боку шаҳрига ташриф доирасида Муфтий Нуриддин домла ҳазратлари ҳамда Озарбайжон мусулмонлари идораси раиси, Шайхулислом Оллоҳшукур Пошозода ўртасида учрашув ташкил этилди.
Мулоқотда томонлар икки мамлакат халқлари ўртасидаги дўстлик ва қардошлик ришталарини янада мустаҳкамлаш, диний соҳадаги ҳамкорликни ривожлантириш ва ўзаро тажриба алмашиш мақсадида, ҳамкорлик қилиш тўғрисидаги Меморандумга имзо чекдилар.
Шунингдек, учрашув давомида Ўзбекистон ва Озарбайжон давлат раҳбарларининг саъй-ҳаракатлари, диний-маърифий соҳага қаратаётган алоҳида эътиборлари натижасида кўплаб хайрли ишлар амалга оширилаётгани, Шарқу Ғарбни ўзаро боғлаган, буюк цивилизациялар туташган Туркий халқлар заминидан етишиб чиққан минглаб олимлар, мутафаккирлар Ислом дини ривожига жуда катта ҳисса қўшганлари, икки давлат диний идоралари ўртасида алоқаларни янада мустаҳкамлаш ҳар томонлама зарурлиги тўғрисида ўзаро фикр алмашилди.
