Шавкат Мирзиёев “Оғузхон” саройида
Давлатимиз раҳбари Туркманистонда тантанали кутиб олинди.
Президент матбуот хизматининг хабар беришича, Туркманистон Президентининг қароргоҳи – “Оғузхон” сарой мажмуасида Ўзбекистон Республикаси Президентини расмий кутиб олиш маросими бўлди.
Олий мартабали меҳмон шарафига фахрий қоровул саф тортди. Икки мамлакатнинг давлат мадҳиялари янгради.
Шавкат Мирзиёев ва Сердар Бердимуҳамедов биргаликда суратга тушди.
Маросимда расмий делегациялар аъзолари иштирок этди.
Айни дақиқаларда давлат раҳбарлари тор доирада музокара ўтказмоқда.
Эслатиб ўтамиз, бўлажак олий даражадаги музокаралар чоғида стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилади. Саммит якунида устувор йўналишлар бўйича ўндан зиёд ҳужжат имзоланиши режалаштирилган.
Ашхобод шаҳрида «Тошкент» боғининг очилиши, «Хоразм - Тошовуз» чегараолди савдо маркази қурилишининг бошланиши ҳам ташрифнинг муҳим воқеалари бўлади.
