1 январдан ўқитувчилар маоши 25 фоиз ошади
Шунингдек, малакали кадрлар тайёрлаш ва уларнинг малакасини ошириш мақсадида янги "Педагог" профессионал стандарти жорий этилади.
Қозоғистонда малакали кадрлар тайёрлаш ва уларнинг малакасини ошириш мақсадида янги «Педагог» профессионал стандарти жорий этилади. Бу ҳақда Ҳукумат йиғилишида мамлакат таълимини 2026 йилгача ривожлантириш концепциясини муҳокама қилиш чоғида таълим вазири Асхат Аймағамбетов маълум қилди.
«Айни пайтда «Педагоглар мақоми тўғрисида»ги қонуннинг ижобий таъсирини кўряпмиз. Президент ташаббуси билан ўқитувчиларнинг иш ҳақи оширилди ва 2023 йил январ ойидан бошлаб яна 25 фоизга оширилади. Бундан ташқари, ўқитувчиларнинг касбий маҳоратини оширишга алоҳида эътибор қаратилмоқда. 2021 йилдан бошлаб ўқитувчилик касбларини сертификатлаш жорий этилди», — деди А. Аймағамбетов.
Бундан ташқари, у ўқитувчилар малакаси энди 5 йилда бир марта эмас, 3 йилда бир марта оширилишини эслатди.
Вазирнинг қўшимча қилишича, директорларнинг кадрлар захираси шакллантирилади, таълим ташкилотлари директорларини ротация қилиш механизмини амалга ошириш давом эттирилади.
