Байден: Украинанинг ўзи ҳудудий ён бериш масаласини ҳал қилиши керак
АҚШ етакчиси Вашингтон Учинчи жаҳон уруши бошлаш ниятида эмаслигини айтди.
АҚШ Украинани парвозлардан ҳоли ҳудуд деб эълон қилишдан воз кечди. Жозеф Байденнинг сўзларига кўра, Қўшма Штатлар учинчи жаҳон урушини бошламоқчи эмас.
Оқ уйдаги матбуот анжуманида АҚШ Президентидан Украинага доимий асосда ёрдам кўрсатиш масаласи сўралган.
"Мен шуни кутяпман. Шу билан бирга, биз Украинага карт-бланш тақдим этмаяпмиз. Улар учун кўп нарса қилдик. Масалан, мендан Украинани парвозлардан ҳоли ҳудудга айлантиришда АҚШ самолётларидан фойдаланишни кўп сўрашди. Аммо биз буни амалга оширмаймиз. Россия самолётларини уриб тушириб, Учинчи жаҳон урушини бошламоқчи эмасмиз", — деган Байден.
Бундан ташқари, Президент украин армияси Россия шаҳарларини бомбардимон қилишини истамаслигини айтган ва шунинг учун 965 км узоқликка учадиган ракеталар бермаганини қайд этган.
Ҳудудий ён беришлар ҳақида гапирар экан, Байден бу масалани Киевнинг ўзи ҳал қилиши кераклигини таъкидлаган. У ушбу масалада Вашингтон Украинага босим ўтказмаслигини қўшимча қилган.
Аввалроқ Россия қўшинлари Херсондан чекиниши тўғрисида хабар берилганди.
