Қашқадарё мактабларига тонналаб яроқсиз кўмир тарқатилди
Вазир йиғилиш ўтказиб, мактабларда куз-қиш мавсумига тайёргарлик ишларини танқид қилди.
Бугун, 23 ноябрь куни Халқ таълими вазири Бахтиёр Саидов раҳбарлигида ҳудудий халқ таълими бошқарма ва бўлимлар, эксплуатация хизмати масъуллари иштирокида мактабларнинг куз-қиш мавсумига тайёргарлик жараёнида кузатилаётган муаммо ва камчиликлар муҳокамасига бағишланган йиғилиш ўтказилди. Бу ҳақда вазирлик матбуот хизмати хабар бермоқда.
Йиғилиш аввалида вазир томонидан халқ таълими муассасаларини 2022-2023 йилги куз-қиш мавсумига тайёрлаш ишлари жойларда талаб даражасида олиб борилмаётганлигини танқид қилиб ўтган.
Хусусан, республика Ишчи гуруҳи томонидан Қашқадарё вилояти Деҳқонобод туманидаги “Ойбек” маҳалла ҳудудида жойлашган 58-сон мактаб ва унинг филиалларига 20 тонна яроқсиз кўмир етказиб берилганлиги, иситиш қозони умуман яроқсиз ҳолатда эканлиги, мактаб ота-оналар томонидан олиб келинадиган ўтин ёрдамида, “буржуйка” печкаларда иситиб келинаётганлиги танқид қилинган.
Вилоятнинг Қамаши туманидаги 85-мактаб филиали аҳволи ҳам ўта ачинарли ва таъмирталаб ҳолатда эканлиги, иситиш тизими йўқлиги, Наманган вилояти Уйчи туманидаги 4-сон мактаб қозонхонасидаги тақсимлаш қутисида носозлик аниқланганлиги қайд этилган.
Йиғилишда куз-қиш мавсумига тайёргарлик жараёнида сусткашликка йўл қўйган соҳа масъулларига тегишли интизомий жазо чоралари қўлланилган.
