Швейцария Эронга дрон эҳтиёт қисмлари сотганми?
Мамлакат расмийси бунга ойдинлик киритди.
Швейцария Эронга тўғридан тўғри дронлар ишлаб чиқариш учун эҳтиёт қисмлари етказиб бермаган. Бу ҳақда Швейцария иқтисодиёт бўйича котибияти вакили Фабиан Майенфиш маълум қилди.
Бундан олдин айрим ОАВда Эроннинг Shahed-136 учувчисиз қурилмасида 52 та хорижда ишлаб чиқарилган деталь борлигини ёзганди. Майенфиш Швейцария Эронга санкциялар туфайли маҳсулот экспорт қилмаслигини эслатиб ўтди.
"Ҳеч қандай тижорий саноат буюмлари етказиб берилмаган. Одатда бу товарлар учинчи давлатларда ишлаб чиқарилади ва бутун дунёга тарқатилади. Шундан келиб чиқиб, Эрон ушбу махсулотларни жаҳон бозоридан сотиб олган", — деган у.
Ғарб давлатлари Эронни Россияга дрон етказиб беришда айбламоқда. Бу Теҳрон томонидан бир неча бор инкор қилинган бўлса-да, кейинчалик ташқи ишлар вазири Амир Абдуллоҳиян хақиқатдан ҳам Москвага қурилмалар сотилганини тан олди. Аммо дипломат бу Украина урушидан бир неча ой олдин амалга оширилганини айтган.
