Онкологик амалиётлар учун чет элга чиқиш 70 фоизга камайди
Ўтган йили 114 нафар беморда юқори технологик жарроҳлик операциялари ўтказилгани айтилмоқда
Республика ихтисослаштирилган онкология ва тиббий радиология илмий-амалий тиббиёт маркази директори:
— Марказимизнинг етакчи мутахассисларидан иборат гуруҳлар мунтазам равишда ҳудудларга чиқиб, маҳорат дарслари, семинарлар ўтказмоқда. Жойларда аҳоли учун тиббий кўриклар ташкил этиляпти.
2022 йил ҳудудларда 10 000 нафарга яқин аҳоли иштирокида ўтказилган тиббий кўрикларда 6 156 нафар бемор аниқланиб, уларнинг 114 нафарида юқори технологик жарроҳлик операциялари ўтказилди.
Марказ амалиётига 7 турдаги, вилоят даражасида 24 турдаги, туман даражасида эса 2 турдаги янги жарроҳлик ва диагностика усуллари татбиқ қилиниб, умумий амалиётлар сони 2021 йилга нисбатан 36 фоизга ошди.
Натижада, жигар ўсмалари, сут бези ва бачадон бўйни раки, кололектал ва буйрак саратони каби касалликлар бўйича беморларнинг хорижга чиқишлари қарийб 70 фоизга камайди.
Ўтган йилнинг ўзида онкологик муассасаларда фаолият юритаётган 112 нафар мутахассис марказда, 78 нафари эса хорижда қайта тайёрланди.
