Ўзбекистонлик қутқарувчилар Туркиядаги вайроналар остидан жами 11 кишини қутқарди
Шунингдек, 33 нафар ҳалок бўлганлар вайроналар остидан чиқарилган.
Ўзбекистон Фавқулодда вазиятлар вазирлиги қутқарувчилари Туркияда рўй берган талафотли зилзила оқибатида вайроналар остида қолган яна икки нафар жабрланганларни қутқарди. Бу ҳақда вазирлик матбуот хизмати хабар берди.
“Ҳатай вилоятида вайроналарни ажратиш пайтида қутқарувчиларимиз яна икки нафар жабрланганни тириклайин олиб чиқишди”, — дейилади хабарда.
8 февраль соат 21:49 ҳолатига кўра, қидирув-қутқарув операцияси бошланганидан буён Ўзбекистон ФВВ қутқарувчилари томонидан жами 11 нафар жабрланган ва 33 нафар ҳалок бўлганлар вайроналар остидан чиқарилган.
Маълумот учун: Туркияга Ўзбекистондан 60 нафар ФВВ қутқарувчилари ва 3 та махсус авария-қутқарув техникаси юборилган. Улар 7 февраль куни жўнаб кетганди. 7 февраль 17:00 ҳолатига Туркиядаги табиий офат оқибатида 1 нафар Ўзбекистон фуқароси ҳалок бўлган. Сўнгги маълумотларга кўра, Туркиядаги зилзилалар оқибатида ҳалок бўлганлар сони 12 391 кишига етган. Жабрланганлар сони қарийб 63 минг кишига етди.
