Туркия элчиси: Ўзбекистондан Туркияга 644 минг АҚШ доллари миқдорида нақд маблағ юборилди

 

Туркиянинг Тошкентдаги элчихонасида Туркияда бўлиб ўткан зилзилада - Ўзбекитон томонидан юборилган барча ёрдамларга миннатдорлик юзасидан   тадбир ўтказилди. Унда элчи Олган Бекар сўзга чиқди.  Дипломат 6 феврль куни юз берган зилзилани “Аср фалокати” деб атади. 

 

“Зилзила яраларини боғлаш учун давлатимиз, халқимиз ва дўстларимиз илк кунданоқ тўлиқ сафарбар бўлдилар. Бунда бутун дунёдаги дўстларимизни ҳам Туркияни ёнида кўришдан мамнун бўлдик. 
Халқаро ҳамжамият намойиш этган фавқулодда бирдамлик ва қўллов мушкул кунимизда бизга таскин бўлди. Халқаро миқёсда кўрсатилган ёрдамларда энг олдинги сафда келган мамлакатлардан биттаси азалий ва абадий қардошимиз Ўзбекистон бўлди.  
Ўзбекистон давлати ва халқи тарихда ҳам бўлгани сингари, бу машъум фалокатдан сўнг ҳам, доимги олийжаноблигини намойиш этиб, ўлкамизни ёлғизлатиб қўймади. Ўзбекистон халқи ва давлат ташкилотлари Президент Мирзиёев етакчилигида деярли сафарбар бўлиб қора кунда дўст эканликларини кўрсатдилар. 
Даставвал Президент Мирзиёев, Вазирлар Маҳкамаси ва давлат ташкилотларининг деярли барча юқори даражали раҳбарлари Элчихонамизга ташриф буюриб, таъзия дафтарни имзолаганлари хотирадан ҳеч қачон ўчмайдиган бирдамлик тимсоли бўлди”, – деди Олган Бекар. 

Элчи Ўзбекистон халқи зилзила оқибатларини бартараф этишда Туркияга катта ёрдам кўрсатганини қайд этди. Юртимиздан юборилган қидирув-қутқарув жамоалари фаолияти алоҳида эътироф этилди. 

Ўзбекистон ҳаво йўллари, Турк ҳаво йўллари, MNG Kargo ва юк транспортлари орқали бугунгача Туркияга 674 тонна гуманитар ёрдам ашёлари етказиб берилди. 

Шу билан бирга, молиявий ёрдамлар “Зираат банк Ўзбекистон” орқали бевосита ёки шу банкда Элчихона томонидан очилган зилзила ёрдам ҳисоблари орқали Туркияга юборилди. Бугунги кунгача 644 000 АҚШ доллари миқдорида нақд маблағ жўнатилгани таъкидланди. 

Расмий ёрдам ҳисобларига маблағлар ҳамон келишда давом этмоқда.