Ўзбекистондаги афғонлар иш билан таъминланди
Бу ҳақда БМТнинг Тараққиёт дастури хабар берди.
Ўзбекистонда вақтинча бўлиб турган 400 дан ортиқ Афғонистон фуқаролари республика жанубидаги Сурхондарё вилоятини кўкаламзорлаштириш лойиҳасига жалб этилди, деб хабар қилди БМТ Тараққиёт дастурининг Ўзбекистондаги ваколатхонаси матбуот хизмати.
Хабарга кўра, Ўзбекистон Табиий ресурслар вазирлиги ва БМТ Тараққиёт дастури вакиллари Ўзбекистон ва Афғонистон фуқаролари иштирокида амалга оширилаётган ўрмонларни барпо этиш бўйича қўшма лойиҳа натижалари билан танишиш мақсадида Сурхондарё вилоятига ташриф буюрди.
“Лойиҳа Афғонистон билан чегарадош Сурхондарё вилоятида Ўзбекистондаги афғон қочқинлари ва мезбон жамоаларнинг ҳимояга муҳтож қатламини нақд пул ва бошқа тўлов механизмларидан фойдаланган ҳолда ўрмонларни қайта тиклаш ишларига жалб этиш орқали фавқулодда инсонпарварлик эҳтиёжларини қондиришга қаратилган”, дейилади БМТ Тараққиёт дастури матбуоти хабарида.
Матбуот хизмати маълумотларига кўра, лойиҳага 413 нафар афғонистонлик қочқин (113 нафар аёл ва 300 нафар эркак) ҳамда 194 нафар маҳаллий аҳоли жалб этилган. 2,5 минг туп дарахт, 287 минг туп саксовул кўчати экилди.
