Ўзбекистон помидорларида вирус аниқлангани айтилмоқда
Ҳолатга Қишлоқ хўжалиги вазирлиги муносабат билдирди.
Ижтимоий тармоқларда Ўзбекистон помидорларида хавфли вирус аниқлангани ҳақида хабарлар тарқалиб, бунга Қозоғистоннинг «24KЗ» телеканали орқали намойиш этилган лавҳа асос қилиб кўрсатилмоқда. Мазкур ҳолатга Қишлоқ хўжалиги вазирлиги муносабат билдирди.
Ҳолатга аниқлик киритиш мақсадида Ўсимликлар карантини ва ҳимояси агентлиги томонидан дастлабки тезкор суриштирув олиб борилган. Маълум бўлишича, Қозоғистон томони Ўзбекистондан импорт бўлган помидор маҳсулотларида помидор жигарранг вируси (Томато бровн ругосе фруит вирус) ва бошқа карантин касалликлар аниқланганлиги юзасидан маҳсулотларни орқага қайтариш ҳолати кузатилмаган ва эътирознома (нотификация) жўнатмаган.
Тарқалган хабарга изоҳ берган фитосанитария хизматининг Туркистон вилояти ҳудудий инспекцияси раҳбари И. Бегасилов помидор жигарранг вируси аниқланиш ҳолати юзасидан импорт бўлган 43 тонна помидор маҳсулотидан айнан Ўзбекистондан юкланган помидорларда хавфли вирус қайд этилмаганини телефон мулоқотида тасдиқлаган.
Қайд этилишича, 2023 йилнинг ўтган даври мобайнида импортер давлатларнинг фитосанитария талабларига мувофиқ жами 24 147 тонна (шундан 14 424 Қозоғистон Республикасига экспорт учун) помидор маҳсулотига халқаро фитосанитария сертификати берилган ва импортер давлатларнинг карантин хизмати томонидан номувофиқлик ҳолатлари аниқланганлик юзасидан эътироз ҳолати қайд этилмаган.
