Миср ҳукумати Ўзбекистонга “gepatit C”га қарши дори воситаларини юборди
Бу 10,5 минг нафар беморларни даволаш тадбирларида ишлатилади.
Миср ҳукумати томонидан Ўзбекистон шифохоналарида фойдаланиш учун инсонпарварлик ёрдами сифатида ажратилган, дунёда кенг тарқалган касалликлардан бири – “gepatit C”га қарши “Даклатасвир” дори воситасининг дастлабки партияси Тошкент халқаро аэропортида кутиб олинди. Бу ҳақда “Дунё” агентлиги хабар берди.
Қайд этилишича, Ўзбекистоннинг Қоҳирадаги элчихонаси томонидан ишлаб чиқилган юкнинг мамлакатга олиб келиниши Ўзбекистон ва Миср ўртасида соғлиқни сақлаш соҳасида ҳамкорликни янада жадаллаштириш, вирусологияда ўзаро қўллаб-қувватлашни ташкил этиш доирасида аввал эришилган келишувларнинг амалий натижаси ҳисобланади.
Умумий қиймати 35 минг долларни ташкил этган 17 минг қутидан ортиқ “Даклатасвир” дори воситаси Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморлар учун ишлатилади.
Таъкидланишича, Ўзбекистон ва Миср соғлиқни сақлаш идоралари 2023—2024 йиллар давомида умумий қиймати 4,8 миллион долларлик жами 800 минг дона (40 тоннага яқин) “gepatit C”га қарши “Даклатасвир” ва “Софосбувир” дори воситаларини мамлакатга бепул етказиб бериш бўйича келишувга эришган.
Апрель бошларида Ўзбекистонда 1 миллион аҳоли вирусли гепатитнинг B ва C турларига қарши скринингдан ўтказилиши маълум қилинганди. Мазкур текширувларда вирусли “gepatit C” касаллиги тасдиқланган 10,5 минг нафар беморларда даволаш тадбирлари амалга оширилади.
Миср ҳукумати Ўзбекистонга “gepatit C”га қарши дори воситаларини юборди.
