Таркибида наркотик модда бўлган анор шарбатлари тўхтатиб қолинди
Ҳолат юзасидан жиноят иши қўзғатилди.
Сурхондарёда Ўзбекистонга синтетик гиёҳвандлик воситаларининг яширин равишда олиб кирилишининг олди олинди, дея хабар бермоқда Божхона қўмитаси матбуот хизмати.
«Айритом» чегара божхона постига 9000 дона пластик идишларга қадоқланган 18 тонна анор шарбати ортилган юк машинаси кириб келган. Юклар «қизил» йўлакка йўналтирилиб, кўрикдан ўтказилганда айрим анор шарбати идишларига «М» ҳарфи белгиси туширилгани, айнан шу идишлардаги шарбатнинг рангги ҳам бошқаларидан бироз фарқ қилиши шубҳа уйғотган. Идиш оғзидаги ҳимоя қатламлари ҳам муқаддам очилгани маълум бўлган
Гиёҳвандлик воситаларини тезкор аниқлашга хизмат қилувчи синама кўмагида ушбу шарбат текшириб кўрилганида, унинг таркибида метамфетамин номли синтетик гиёҳвандлик воситаси борлиги аниқланган.
«Айнан „М“ ҳарфи туширилган шарбатлар сони 48 дона бўлиб, идиши билан ҳисоблаганда уларнинг умумий оғирлиги 103 килограммни ташкил қилди. Юклар Тошкент шаҳридаги маъсулияти чекланган жамиятлардан бирининг номига юборилаётган бўлган», — дейилади хабарда.
Ҳозирда ҳолат юзасидан божхона органлари томонидан жиноят иши қўзғатилди.
