EPS-Topik тест имтиҳонига ноқонуний кирмоқчи бўлганлар ушланди
Бу ҳақда Ташқи меҳнат миграцияси агентлиги хабар берди.
Корея Республикасида ишлаш истагидаги фуқаролар учун Тошкент шаҳрида бўлиб ўтаётган EPS-Topik тестида имтиҳон тартибларига риоя қилмасликнинг оқибатлари ҳақида огоҳлантирилганига қарамай, рўйхатдан ўтган фуқаролар Ш.Ш. ва A.A. ўрнига бошқа фуқаролар киришга уринган вақтида Ташқи меҳнат миграцияси агентлиги ходимлари томонидан ушлаб қолинган.
Агентликнинг маълум қилишича, ушбу ҳолат баёнлаштирилиб, тегишли ташкилотларга тақдим этилди.
«Тест имтиҳони қоидаларини бузган фуқаро 2 йил давомида ушбу имтиҳонда қатнашиш имкониятидан маҳрум бўлиши ҳамда қонунчиликда белгиланган жавобгарликка тортилиши мумкинлиги ҳақида яна бир бор огоҳлантирамиз.
Имтиҳон жараёнида барча тартиб-қоидаларга риоя қилишга чақирамиз!», — дейилади хабарда.
