Жиззахда тақиқланган диний материалларни тарқатган 19 ёшли бола қамалди
У уч йилдан бери "Telegram" орқали турли ақидапарастлик ғоялари мавжуд маълумотлар билан танишиб келган.
Жиззахда тақиқланган диний материалларни тарқатган 19 ёшли йигитга 3 йил озодликни чеклаш жазоси тайинланди. У ўзининнг 58 кишилик Telegram-каналида турли ҳил диний мазмундаги материалларни жойлаштириб, танишлари билан муҳокама қилиб келган.
Жиноят ишлари бўйича Жиззах шаҳар судида тақиқланган диний мавзудаги материалларни тарқатган 19 ёшли йигитга нисбатан суд ҳукми ўқилди. Бу ҳақда Олий суд матбуот котиби Азиз Обидов ўзининг Telegram каналида хабар берди.
Судланувчи ўзининг телефонида 2020 йилнинг март ойидан буён мунтазам равишда Telegram мессенжери орқали Ўзбекистонда фаолияти тақиқланган турли ақидапарастлик ғоялари мавжуд маълумотлар билан танишиб келган.
Шундан сўнг, 58 нафар ўзига яқин танишлари ва бошқа шахсларни ўзининг шахсий Telegram-каналига қўшиб турли хил диний мазмундаги материалларни жойлаштириб, муҳокама қилиб келган. Суд залида у қилган ишларидан пушаймонлигини билдириб, кечириб сўради.
Жазони оғирлаштирувчи ҳолатлар аниқланмагани, судланувчининг оилавий ҳолати ҳамда маҳалладан берилган кафолат хати инобатга олиниб, йигитга Жиноят кодексининг 244−1-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) билан айбдор деб топилиб, 3 йил озодликни чеклаш жазоси тайинланди.
