Шавкат Мирзиёев EИИ кенгашида Тошкентдан қатнашади
Бу ҳақда Россия Президенти Владимир Путин маълум қилди.
Унга кўра 25 май куни йиғилиш қатнашчилари тор доирада фикр алмашади, сўнгра кенгайтирилган таркибда учрашув давом этади.
“Унда Ўзбекистон Президенти Шавкат Миромонович Мирзиёев ҳам видеоконференсалоқа орқали иштирок этади. Айни пайтда у муҳим, юқори даражадаги ички сиёсий жараёнларни олиб бормоқда. Шахсан қатнашмаётгани учун уни тўғри тушинишингизни сўради. Шунга қарамай у иштирок этади”, деган Путин.
Шунингдек, Путин кенгайтирилган таркибдаги йиғилишда Озарбайжон Президенти Илҳом Алиев қатнашишини, Тожикистон Президенти Имомали Раҳмон эса видеоконференсалоқа орқали иштирок этишини билдирган.
Маълумот ўрнида, ҳозирда учрашувда Арманистон Бош вазири Никол Пашинян, Беларус фуқароси Александр Лукашенко, Қозоғистон Президенти Қосим-Жомарт Тўқаев, Қирғизистон Президенти Садир Жапаров ва Евроосиё иқтисодий комиссияси ҳайъати раиси Михаил Мясникович ҳам иштирок этмоқда.
Эслатиб ўтамиз, олдинроқ Озарбайжон Президенти Илҳом Алиев Москвага борган эди. У Путин воситачилигида Арманистон Бош вазири Никол Пашинян билан музокара ўтказиши кутилмоқда.
