Тошкент вилоятида ўқувчилар мажбурий тадбирга жалб этилди
Ўқувчилар ҳаракати сабаб серқатнов кўчада тирбандлик юзага келган.
Жорий йилнинг 8 май куни ижтимоий тармоқларда Чирчиқ шаҳридаги 17-сонли умумтаълим мактаби ўқувчилари соат 9:30да дарсга киритилмасдан, мажбурий тарзда тадбирга жалб этилгани ҳақида танқидий хабар тарқалган.
Ушбу ҳолат юзасидан Чирчиқ шаҳар мактабгача ва мактаб таълими бўлими шу куннинг ўзида ўрганиш олиб борган ва қуйидагиларни аниқлаган. Ҳақиқатдан ҳам мактабнинг 1-сменада ўқийдиган 435 нафар ўқувчилари иштирокида “9-май Хотира ва қадрлар куни” муносабати билан мактабнинг маънавий маърифий-ишлар ҳамда ўқув ишлари бўйича директор ўринбосарлари ташаббуси билан Чирчиқ шаҳридаги Трансформатор заводи ҳудудидаги ёдгорлик мажмуасига саёҳат уюштирилган.
Ўқувчилар ҳаракати давомида серқатнов кўчада тирбандлик юзага келган. Вазиятдан хабардор бўлган шаҳар Мактабгача ва мактаб таълими бўлими раҳбарияти шу вақтнинг ўзида ўқувчиларни дарсга қайтарган.
Ўқувчиларни махсус рухсатсиз дарс вақтида тадбирга жалб қилган мактаб маъмуриятига шаҳар Мактабгача ва мактаб таълими бўлими томонидан интизомий чора кўрилган.
