Тўғон суви Нова Каховка шаҳрини ювиб кетмоқда
Сув сатҳи 12 метргача кўтарилиши мумкин.
Украинанинг Херсон вилояти Каховка шаҳридаги тўғон ўққа тутилиб вайрон этилгани ҳақида хабар берган эдик. Сўнгги маълумотларга кўра, Нова Каховка яқинидаги Днепр кўчаси сув остида қолмоқда. Шаҳар мери Владимир Леонтьевнинг маълум қилишича, кўчадаги сув сатҳи 10 метрга етган.
Унинг сўзларига кўра, Новая Каховкадаги Днепр кўчаси аллақачон сув остида қолган.
«Демак, сув 10 метрдан кўпроқ кўтарилган», – деди Леонтьев. – «Тўғон ювиб кетилмоқда. Сув сатҳи 12 метргача кўтарилиши мумкин», – дея қўшимча қилди у.
Шаҳар ҳокими соҳилбўйи сув босган ҳудудлардан одамлар эвакуация қилинаётганини маълум қилди.
«Ҳозирги вазифамиз одамларни шаҳардан ташқарига чиқариш, электр токи уриши ҳолатларини бартараф этишдир. Шунинг учун электр энергиясидан қуйи оқимдаги аҳоли пунктлари ўчирилган. Одамлар хавфсиз жойларга кўчмоқда. Ваҳимага ўрин йўқ», – деди у.
Леонтьев, шунингдек, Украина Қуролли кучлари томонидан Новая Каховкани ўққа тутиш давом этаётганини таъкидлади.
