Абитуриентлар энди имтиҳон жавоби чиққач йўналиш танлашлари мумкин
Олий таълим, фан ва инновациялар вазири қабул жараёнларида кутилаётган ўзгаришлар ҳақида маълумот берди.
Олий таълим, фан ва инновациялар вазири Иброҳим Абдураҳмонов абитуриентлар тест натижалари маълум бўлганидан сўнг йўналишларни танлаш имкониятига эга бўлиши мумкинлигини айтди. Бу ҳақда у янги ўқув йилига оид ўзгаришларга бағишланган суҳбатда маълум қилди.
Абдураҳмонинг айтишича, келгуси йилларда ОТМларга қабул жараёнида бир қатор ўзгаришла бўлиши кутилмоқда
«Абитуриент ўқишга ҳужжат топшираётганда 5 та йўналишни танлайди. Имтиҳондан ўтгач, тест натижалари чиққандан кейин йўналишларни танлаш имкониятини берамиз. Бу кейинги ўқув йилидан бошланиши мумкин. Ҳозир шунинг устида ишлаяпмиз. Албатта, бу янгилик бўлади», – деди Абдураҳмонов.
Вазир ушбу қарорни абитуриентлар имтиҳонга оз қолганда фикрини ўзгартириб, йўналишини ўзгартиришни сўраб қолиш ҳолатлари кўпайгани билан изоҳлаган.
«Бундай муаммолар бор. Абитуриент йўналишини ўзгартиришини сўраб вазирликка мурожаат билан келган вазиятлар кўп бўлган. Шунинг учун янги тартиб ҳақида ўйлаяпмиз», – деди вазир.
