АҚШ денгиз портлари хакерлар нишонида: киберҳужумлар сони кескин ошди
Мутахассислар бундай ҳужумлар юк ташиш ва энергия ресурслари экспортига жиддий зарар етказиши мумкинлигидан огоҳлантирмоқда.

АҚШнинг йирик денгиз портлари тобора кўпроқ киберҳужумларга дуч келмоқда. Бу ҳақда Financial Times нашри хабар берди.
Нашр маълумотларига кўра, Техас штатида жойлашган Корпус-Кристи портига ҳар куни юзлаб, айрим ҳолларда минглаб киберҳужум уринишлари амалга оширилмоқда. Мамлакатнинг хом нефть экспорти бўйича энг йирик маркази ҳисобланган ушбу портда хакерлар турли усуллар, жумладан, паролларни бузиш ва раҳбарлар номидан сохта хабарлар юбориш орқали тизимларга киришга уринмоқда.
Лос-Анжелес порти эса август ойида 120 миллиондан ортиқ киберҳужум уринишини қайтарган. Ҳужумлар орасида тармоқ тизимларига рухсатсиз кириш, маълумотларни ўғирлаш ва зарарли дастурлардан фойдаланишга уринишлар бўлган.
Financial Times ёзишича, АҚШ соҳил қўриқлаш хизмати маълумотларига кўра, 2025 йилда денгиз транспорти инфратузилмасига оид киберинцидентлар сони аввалги йилга нисбатан 17 фоизга ошган.
Мутахассислар портларнинг рақамли тизимларига муваффақиятли ҳужум қилиниши юк ташиш жараёнларини тўхтатиб қўйиши, энергия ресурслари экспортига зарар етказиши ва денгиз транспорти хавфсизлигига таҳдид солиши мумкинлигидан огоҳлантирмоқда.








