Самарқандда аёлнинг суратини тарқатмаслик эвазига битта iPhone ва 6500 доллар талаб қилган эркак ушланди
У энди 8 йилгача озодликдан маҳрум қилиниши мумкин.
Самарқанд вилоятида Одноклассники ижтимоий тармоғида товламачилик содир этган шахс ушланди. Бу ҳақда вилоят ИИБ ахборот хизмати хабар бермоқда.
Самарқанд шаҳрида яшовчи 36 ёшли З.Н. ариза билан мурожаат қилиб, ўзининг Одноклассники ижтимоий тармоғида жойлаштирган фотосуратларини “номаълум шахс” юклаб олиб, уятли расмлари борлигини айтиб пул талаб қилаётганлигини маълум қилган.
Олиб борилган тезкор-суриштирув ишлари натижасида пулларни ўзлаштирган шахс муқаддам судланган Самарқанд шаҳрида яшовчи 35 ёшли Т.У. эканлиги аниқланган.
Т.У. Одноклассники ижтимоий тармоғида З.Н. жойлаштирган фотосуратларини юклаб олиб, уларга махсус дастурлардан фойдаланиб ишлов бериб, ушбу уятли фотосуратларни, ижтимоий тармоқларга тарқатиб юбормаслик эвазига 6 500 АҚШ доллари, бир дона Apple iPhone 13 Pro ва бир дона эркаклар тилла занжири талаб қилганлиги маълум бўлди.
Мазкур ҳолат юзасидан, Т.У.га нисбатан Жиноят кодексининг 168-модда 3-қисми билан жиноят иши қўзғатилиб, тергов ҳаракатлари олиб борилмоқда.
Қонунга мувофиқ, T.У. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
