Қорақалпоғистонда гиёҳванд моддалар бизнесига чек қўйилди
Бу ҳақда Қорақалпоғистон Республикаси божхона бошқармаси ахборот хизмати маълум қилди.
Қорақалпоғистон Республикаси божхона бошқармасининг контрабандага қарши курашиш бўлими ходимлари томонидан тезкор тузилмалар билан ҳамкорликда олдиндан олинган маълумотлар асосида Тўрткўл тумани, “Мискин” ЙПХ постида “Самарқанд-Хўжайли” йўналишида ҳаракатланиб келаётган Cobalt русумли автотранспорт воситаси тўхтатилиб, белгиланган тартибда кўздан кечирилди.
Натижада, орқа ўриндиқдаги кулранг шим орасидан, оқ рангли целлофан пакетга солинган 2 дона ўрамда, автотранспорт воситаси салонидаги яширин жойлар ичидан яна 2 та ўрамда ўткир ҳидли гиёҳвандлик воситасига ўхшаш моддалар борлиги аниқланди.
Тайинланган экспертиза хулосасига кўра, ашёвий далил тариқасида олинган моддалар 297,72 грамм оғирликдаги “Опий” ва 71,77 грамм “Гашиш” гиёҳвандлик воситалари экани аниқланди.
Мазкур ҳолат юзасидан ушбу фуқарога нисбатан Ўзбекистон Республикаси Жиноят кодексининг 25 ва 273-моддаси 5-қисми билан жиноят иши қўзғатилди.
Тўрткўл туманидаги “Мискин” ЙПХ масканида ўтказилган навбатдаги тезкор тадбир давомида эса “Cobalt” русумли автотранпорт воситасида йўловчи бўлиб келаётган фуқаро шубҳа остига олиниб, белгиланган тартибда холислар иштирокида шахсий кўрикдан ўтказилди.
Ички кийимлари орасига 9 дона целофан пакетларга ўралган, ўткир ҳидли, кристалсимон гиёҳвандлик моддасига ўхшаш моддаларни устамонлик билан яширган экан.
Ашёвий далил тариқасида олинган моддалар экспертлар хулосасига кўра соф оғирлиги 8,15 грга тенг бўлган “героин” гиёҳвандлик моддаси экани маълум бўлди.
Юқоридаги ҳолатлар юзасидан тўпланган иш материаллари тергов органларига ўтказилган.
