Тошкентда ичида одамлар бўлган лифтнинг қулаб тушиш сабаблари очиқланди
Ҳозирда Тошкент шаҳри ва вилоятлардаги кўп қаватли уйларда ўрнатилган лифтларни техник кўрикдан ўтказиш бошланган.
Тошкент шаҳрининг Янгиҳаёт туманидаги кўп қаватли уйларнинг бирида лифтда носозлик юз бериб, одамлар жароҳатлангани ҳақида хабар берилганди. Саноат хавфсизлиги давлат қўмитаси ҳолат юзасидан ўрганиш ишлари натижаси ҳақида маълумот берди.
Аниқланишича, 18 июнь куни тахминан соат 16:00 да Тошкент шаҳри, Янги ҳаёт тумани, «Янги Дархон» МФЙда жойлашган 17-сонли 16-қаватли кўп хонадон уй 2023 йил апрель ойида фойдаланишга топширилган. Кўп қаватли уйдаги лифт Туркия корхонаси томонидан 2022 йилда ишлаб чиқарилган.
Юк кўтариш қуввати 1000 кг бўлган лифт қурилмаси 16-қаватдан 1-қаватга ҳаракатга келгач, лифтнинг тезлигини назорат қилувчи яъни тўхташ лозим бўлган этажга яқинлашган лифт кабинасини секинлатувчи (датчик замедления) қурилмаси носозлиги сабабли тезлик камаймаганлиги ва 1-қаватга яқинлашганда лифтнинг автоматик тормоз тизими ишга тушиб тўхтаганлиги ва тезлик камаймаганлиги туфайли шахтада ўрнатилган буфер қисмига келиб ўрилганлиги тахмин қилинмоқда.
Натижада лифт тўхтагандан сўнг мазкур мавзедаги домларга хизмат кўрсатувчи инжинеринг компанияси «Premium Promotion» МЧЖнинг лифтларга хизмат кўрсатувчи мутахассислари томонидан эшикни очиб лифтдан 11 кишини чиқариб олган, булардан 3 киши турли хил синишлар билан шифохонага ётқизилган.
Ҳозирда ушбу ҳудуддаги кўп қаватли уйларга хизмат кўрсатувчи компанияга тегишли лифтларни қайта навбатдан ташқари техник назоратдан ўтказиш ишлари амалга оширилмоқда.
Бундан ташқари, мутахассислар томонидан Тошкент шахри ва вилоятлардаги кўп қаватли уйларда ўрнатилган лифт қурилмаларни техник кўрикдан ўтказиш ишлари бошланган.
