Давлат нотариал идоралари ишчиларига овқатланиш харажатлари қоплаб берилади
Овқатланиш учун ҳар ойлик тўлов БҲМнинг 2 бараваригача бўлиши мумкин.
Адлия вазирлиги, Иқтисодиёт ва молия вазирлиги ҳамда Камбағалликни қисқартириш ва бандлик вазирлигининг «Давлат нотариал идоралари ва нотариал архивлар фаолиятини молиялаштириш тартиби тўғрисидаги низомни тасдиқлаш ҳақидаги қарорига ўзгартириш ва қўшимчалар киритиш ҳақида»ги қўшма қарори қабул қилинди.
Қарор билан давлат нотариал идоралари ва Адлия вазирлиги ҳузуридаги нотариал архивлар ходимларини моддий рағбатлантириш турлари кенгайтирилмоқда. Эндиликда ходимларга расмий байрам кунлари муносабати билан бир маротабалик мукофот пули тўланиши, уларнинг овқатланиш ва йўлкира харажатлари қопланиши ҳамда қишлоқ хўжалиги маҳсулотларини харид қилиш учун моддий ёрдам ажратилиши мумкин.
Шунингдек уларнинг миқдори ўрнатилмоқда:
- бир маротабалик мукофот пули – бир ойлик маош миқдоригача;
- овқатланиш учун ҳар ойлик тўлов – БҲМнинг 2 бараваригача;
- йўлкира учун компенсасия – БҲМнинг 1 бараваригача;
- қишлоқ хўжалиги маҳсулотларини харид қилиш учун бир йилда бир маротаба (қоида тариқасида, куз ойларида) моддий ёрдам – БҲМнинг 10 бараваригача.
