Қурилиш ишлари сабабли Тошкентда яшиллик даражаси 25 фоизга камайди
Шунингдек, Бухоро шаҳрининг марказий қисмида ҳам яшиллик даражаси 37 фоизга қисқарган.
Макроиқтисодий ва ҳудудий тадқиқотлар институти экспертлари маълумотларига кўра, қурилиш ишларининг жадаллашуви натижасида яшиллик даражаси 2022 йилда 2017 йилга нисбатан Тошкент шаҳрининг Шайхонтоҳур туманида 26 фоиз, Яккасарой туманида 23 фоиз, Олмазор туманида 33 фоиз, Мирзо Улуғбек туманида 18 фоизга қисқарган. Бундай ҳолатни республиканинг бошқа ҳудудлари мисолида олганда Бухоро шаҳрининг марказий қисмида яшиллик даражаси 37 фоизга қисқарган.
Маълумотларга кўра, парклар, жамоат боғлари ва бошқа яшил майдонларга ташрифлар руҳий саломатликни яхшилайди. Хусусан, ҳафтасига 3-4 марта яшил ҳудудларда сайр қилувчилар бир марта ёки ундан кам ташриф буюрувчиларга қараганда руҳий саломатлик дориларидан 33 фоиз, қон босими дориларидан 36 фоиз ва астма дориларидан 26 фоизга кам фойдаланиши аниқланди.
Маълум қилинишича, Ўзбекистонда 2012-2016 йилларда квартира (уй)лар сони 6,6 фоизга ўсган бўлса, 2017-2021 йилларда ўсиш ўтган 5 йилликдагидан 3 баробар ортиқ (20,3 фоиз) бўлди. Бу даврда энг кўп уйлар Самарқанд, Қашқадарё, Бухоро вилоятлари ва Тошкент шаҳрида қурилди.
