Тошкент вилоятида ички ишлар ходимлари резина таёқдан фойдаланиб, фуқарога жисмоний куч ишлатди

 

Ижтимоий тармоқларда «Ғишт кўприк божхона пости олдида фуқаро Ички ишлар ходимларига пичоқ билан ҳужум қилди» мазмунли хабарлар кўплаб муҳокамаларга сабаб бўлди. Ҳолат юзасидан Тошкент вилояти Ички ишлар бош бошқармаси батафсил маълумот берди.
 

Унга кўра, аниқланишича, 7 июль куни, Тошкент тумани ҳудуди, «Ғишт кўприк» божхона пости олдида, Сирдарё вилоятида яшовчи 1965 йилда туғилган фуқаро, ҳеч бир сабабсиз, йўл ёқасидан ҳаракатланиб кетаётган, ўзига бегона бўлган 40 ёшли фуқаронинг қорин қисмига, ёнида бўлган пичоқ билан тўсатдан зарба бериб, тан жароҳати етказган.

 

Натижада воқеа содир бўлган ҳудудда хизмат олиб бораётган Тошкент вилояти ИИББ ППХ ходимлари ушбу шахснинг олдига бориб, ундан зудлик билан ҳаракатларини тўхтатишни талаб қилганларида, фуқаро ходимларга ва атрофдаги бошқа фуқароларга ҳам қўлидаги пичоқ билан ташланиб, таҳдид қилган.

 

«Ходимлар ушбу шахсни, атрофдаги бошқа фуқароларга ҳам шикаст етказишини олдини олиш мақсадида, хизматда фойдаланиш учун бириктирилган махсус резина таёғини ишлатиб, жисмоний куч қўллаган ҳолда фуқарони қўлга олишган ва зарарсизлантирилган. Жароҳатланган фуқаро ходимлар томонидан тезлик билан шифохонага олиб борилган», — дейилади Тошкент вилояти ИИББ хабарида.
 

 

Ҳолат юзасидан ушланган шахсга нисбатан Жиноят Кодексининг 104-моддаси 2-қисми билан жиноят иши қўзғатилиб, тергов ҳаракатлари олиб борилмоқда. Шунингдек, гумонланувчи фуқаронинг руҳий ҳолати юзасидан психологик экспертиза тайинланган.