Зиёратга юбориш ваъдаси: “Умра” зиёратини ноқонуний ташкил этишга уринганлар аниқланди
Уч ҳудудда фуқароларни ноқонуний зиёратга юбориш эвазига пул олган шахслар ушланди.

Навоий, Наманган ва Қўқон шаҳарларида фуқароларни ноқонуний равишда «Умра» зиёратига юборишга уриниш билан боғлиқ ҳолатлар аниқланди. Бу ҳақда Давлат хавфсизлик хизмати хабар берди.
Навоий вилоятининг Қизилтепа туманида яшовчи, 1979 йилда туғилган шахс туристик фирмаларда ишлайдиган танишлари орқали икки фуқарони «Умра»га юборишни ваъда қилиб, фирибгарлик йўли билан 2 500 доллар олган вақтида ушланган. Унга нисбатан Жиноят кодексининг 168-моддаси 1-қисми билан жиноят иши қўзғатилган.
Наманган шаҳрида эса 1981 йилда туғилган шахс ўзини туристик фирма вакили сифатида таништириб, уч нафар фуқарони зиёратга юбориш эвазига 3 150 доллар талаб қилган. У олдиндан 1 100 доллар олган вақтида ушланган. Маълум бўлишича, мазкур шахс аввал ҳам фирибгарлик жиноятлари учун судланган ва пробация назорати остида бўлган. Унга нисбатан ҳам Жиноят кодексининг 168-моддаси 1-қисми билан жиноят иши қўзғатилган.
Қўқон шаҳрида ўтказилган тадбирда эса «Умра» зиёратини ташкил этиш ҳуқуқига эга бўлмаган туристик фирма раҳбари икки фуқарони зиёратга юбориш эвазига 2 300 доллар олган вақтида ашёвий далиллар билан ушланган. Ушбу ҳолат юзасидан Жиноят кодексининг 25, 168-моддаси 1-қисми билан жиноят иши қўзғатилган.
Ҳар уч ҳолат бўйича тергов ҳаракатлари олиб борилмоқда.








