Ўзбекистон парламенти қуйи палатаси ёнидаги «пешеход»да ЙТҲ юз берди
"Damas" аёл кишини уриб юборган.
Олий Мажлис Қонунчилик палатаси биноси ёнидаги тартибга солинмаган пиёдалар ўтиш йўлида йўл-транспорт ҳодисаси содир бўлди. Бу ҳақда ИИВ ЙҲХХ ахборот хизмати хабар берди.
Маълум қилинишича, 21 июль куни соат 19:00 ларда Чилонзор тумани Бунёдкор шоҳ кўчасида ҳайдовчи Lacetti русумли автомашинасини бошқариб келаётиб, ўзидан олдинда кетаётган Damas русумли автомашинаси билан тўқнашув содир этган.
Тўқнашув зарбидан сўнг Damas автомашинаси тартибга солинмаган пиёдалар ўтиш жойида йўлни кесиб ўтаётган пиёдани уриб юборган. ЙТҲ оқибатида тан жароҳат олиб шифохонага ётқизилганлар ҳақида маълумот келиб тушмаган.
Ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
“Ҳайдовчилардан автомашина бошқариш давомида тартибга солинмаган пиёдалар ўтиш жойларига яқинлашганда тезликни пасайтиришларини ва пиёдаларга тўхтаб йўл бериб, ўтказиб юборишларини, оралиқ масофа сақлаб ҳаракатланишларини сўраб қоламиз”, — дейилади хабарда.
