Ички ишлар вазири ўринбосари Нажмиддин Тўрахўжаев лавозимидан озод қилинди
Республика бўйича аҳолининг барча тезкор ва шошилинч хизматларга мурожаатларини ҳал қилиш мақсадида ягона «112» тезкор рақами ишга туширилади
Шавкат Мирзиёев иштирокида бўлиб ўтган ИИВ кенгайтирилган ҳайъат йиғилишида Ички ишлар вазир ўринбосари Нажмиддин Тўрахожаев лавозимидан озод қилди.
Президент матбуот хизмати маълумотларига кўра, тизимда рақамлаштириш аҳволи қониқарсизлиги танқид қилинди. Ички ишлар вазирининг бу масалалар учун масъул ўринбосари зиммасига юклатилган бирорта вазифа охиригача етказилмагани кўрсатиб ўтилди ва шу муносабат билан вазир ўринбосари Н.Тўрахожаев эгаллаб турган лавозимидан озод қилинди.
Шунингдек, йиғилишда Ички ишлар ва Рақамли технологиялар вазирликларига икки ой муддатда ҳар бир вилоят-туман-маҳалла кесимида ижтимоий ва криминоген муаммоларни рақамлаштириш орқали “Ижтимоий вазият” ахборот тизимини ишга тушириш топширилди. Бунда, аҳоли норозилигига сабаб бўлаётган ижтимоий муаммоларнинг ягона реестри шакллантирилади, масъул идораларнинг кучи муаммога қараб манзилли йўналтирилади.
Бундан буён вилоят ва туман ички ишлар раҳбарлари ҳар ойда камида бир марта туман ва шаҳар кенгашларига жиноятчилик аҳволи бўйича ҳисобот бериши белгиланди. Бундан ташқари, Ички ишлар ва Рақамли технологиялар вазирликлари олдига аҳолининг барча тезкор ва шошилинч хизматларга мурожаатларини оператив ҳал қилиш мақсадида ягона «112» тезкор рақами ва диспетчерлик тизимини ишга тушириш вазифаси қўйилди.
Ушбу тизим 2024 йил 1 январдан Тошкент шаҳрида, 1 июлга қадар водий вилоятларида, келаси йил якунига қадар эса барча туман ва шаҳарларда ишга туширилиши шарт. Шу орқали навбатчилик қисмлари фаолияти ҳам тубдан қайта кўриб чиқилади.
