Фарғонада ҳайдовчи ва фуқаро ўртасидаги жанжал ортидан бир қатор ИИО ходимлари ишдан олинди
Ходимлар жанжал содир бўлган пайтда вазифасини тўлиқ бажармаган.
Аввалроқ Фарғонада такси чақирган фуқаро ҳайдовчининг телефони ўчиб қолиши сабабли қўнғироқларига жавоб бермагани учун машина ойналарини синдиргани ҳақида хабар берилганди.
Вилоят ИИБнинг хабар беришича, жанжал содир бўлган вақтдаги ИИО ходимларининг хатти-ҳаракатлари юзасидан тайинланган хизмат текшируви якунига кўра, ўз хизмат вазифасини лозим даражада бажармаганликлари учун Фарғона вилояти ИИБ патруль-пост хизмати отрядининг икки нафар сафдор ходимлари ҳамда гуруҳ командири капитан З.O. эгаллаб турган лавозимидан озод этилган.
Шунингдек, Жамоат хавфсизлиги хизмати жамоат тартибини сақлаш бошқармаси патруль-пост хизмати батальони командирига нисбатан ҳайфсан интизомий жазоси қўлланилган.
