Тошкент вилоятида экоинспектор калтакланди
Ҳолат юзасидан жиноят иши қўзғатилди.
Тошкент вилояти Экология бошқармаси Оҳангарон тумани инспекторига хизмат вақтида тан жароҳати етказилгани юзасидан жиноят иши қўзғатилди. Бу ҳақда Бош прокуратура матбуот хизмати хабар берди.
Қайд этилишича, воқеа 10 август куни содир бўлган. Унга кўра, Тошкент вилояти экология атроф-муҳитни муҳофаза қилиш ва иқлим ўзгариши бошқармаси Оҳангарон тумани инспекцияси масъул ходими «Ойбулоқ» маҳалласида жойлашган фермер хўжалигидаги дала майдонида хизмат вазифасини бажараётган вақтида ушбу маҳаллада яшовчи фуқаро уни уриб тан жароҳати етказиб, хизмат гувоҳномаси ҳамда иш ҳужжатларини тортиб олиб, ҳужжатларига шикаст етказган.
Бош прокуратура хабарига кўра, мазкур ҳолат юзасидан Оҳангарон тумани прокуратураси томонидан Жиноят кодексининг 219 (Ҳокимият вакилига ёки фуқаровий бурчини бажараётган шахсга қаршилик кўрсатиш) ва бошқа моддалар билан жиноят иши қўзғатилган.
