Жиззахда кўчатлар қуриб қолиши сабабли Ободонлаштириш бошқармаси бўлим бошлиғи жаримага тортилди
«Яшил макон» умуммиллий лойиҳаси доирасида Бахмал туманидаги маҳаллаларнинг бирида экилган кўчатларнинг ярмига яқини қуриб қолган.
Экология, атроф-муҳитни муҳофаза қилиш ва иқлим ўзгариши вазирлигининг хабар беришича, Жиззах вилояти Экология бошқармаси Бахмал тумани бўлими ходимлари томонидан навбатдаги рейд ўтказилган.
Рейд давомида Бахмал тумани Ободонлаштириш бошқармаси томонидан «Фидокор» МФЙ ҳудудига «Яшил макон» умуммиллий лойиҳаси доирасида экилган 1332 туп манзарали кўчатларнинг 450 тупи сувсизлик натижасида қуриб қолгани аниқланган.
Ҳолати юзасидан туман Ободонлаштириш бошқармаси бўлим бошлиғига Маъмурий Жавобгарлик тўғрисидаги кодекснинг 79-моддаси 3-қисмига асосан БҲМнинг 10 баробари — 3 миллион 300 минг сўм миқдорида жарима белгиланган.
