Ўзбекистон Афғонистонга дори маҳсулотлари етказиб беради
Икки мамлакат фармацевтика ҳамда соғлиқни сақлаш соҳасида ҳамкорликни кенгайтиришга келишиб олди.
Афғонистонга Ўзбекистондан йилига ўртача 1 млн долларлик протеин ва витамин комплексларини етказиб бериш бўйича келишувларга эришилди. Бу ҳақда Фармацевтика тармоғини ривожлантириш агентлиги хабар берди.
Ўзбекистон вазирлик ва идоралари масъулларидан иборат бир гуруҳ вакиллар Афғонистонда бўлди. Делегация таркибида Фармацевтика тармоғини ривожлантириш агентлиги бошқармаси бошлиғи Шерзод Якубов ҳам бўлиб, фармацевтика ва соғлиқни сақлаш соҳасида Афғонистон ва Ўзбекистон ўртасидаги ҳамкорлик масалаларида музокаралар олиб бормоқда.
«Афғонистоннинг ‘Fyucher Vels Trayding’ компанияси директори билан Ўзбекистондаги ишлаб чиқарувчилар томонидан йилига ўртача 1 млн долларлик протеин ва витамин комплексларини етказиб бериш бўйича келишувларга эришилди», - дейилади хабарда.
Хусусан, Афғонистон Аҳоли саломатлиги вазирлигининг фармацевтика хизматлари директори Ҳамид Фурмули билан мазкур мамлакатдаги «Ибн Сино» корхонаси негизида шартнома тузиш масалалари муҳокама қилинди. Бундан ташқари, стоматология хизматлари кўрсатиш бўйича Кобул шаҳрида атиги битта корхона фаолият кўрсатиб келаётган бўлиб, учрашувлар давомида Афғонистон тиббиёт ходимларини «Health manager» бўйича малакасини ошириш, қисқа муддатли курсларда ўқитиш масалалари келишиб олинди.
Мазкур ҳолатлар эътиборга олиниб, Ўзбекистонда ишлаб чиқарилган дори маҳсулотларини ушбу мамлакат бозорига етказиш борасида Афғонистон «Озиқ-овқат ва дори воситаларини сифатини назорат қилиш» миллий уюшмаси раиси билан самарали музокаралар олиб борилди.
