«Ташаббусли бюджет» хакерлик ҳужумига учради
Бу ҳақда Иқтисодиёт ва молия вазирлиги хабар берди.
«Ташаббусли бюджет» жараёнининг 2023 йил 2 мавсуми доирасида овоз бериш босқичи 27 августдан бошланди. Овоз бериш жараёнларининг дастлабки кунлари фойдаланувчилар томонидан тизимда айрим техник муаммолар кузатилаётгани бўйича эътирозлар билдирилди.
Иқтисодиёт ва молия вазирлигининг маълум қилишича, ушбу ҳолат овозлар сонини сунъий равишда кўпайтириш мақсадида ишлаб чиқилган норасмий ботлар орқали овоз йиғиш, шунингдек, турли хил спам ва хакерлик ҳужумлари оқибатида юзага келган.
Хабарда бу каби уринишларнинг олдини олиш учун қўйилган чекловлар натижасида ахборот порталида бир қатор узилишлар рўй бергани айтилди.
Ҳозирда барча зарурий техник чоралар кўрилиб, ахборот портали фаолияти мўътадиллаштирилгани маълум қилинган.
