Жиззахда Зомин аэропорти фойдаланишга топширилди
У 30 ўринга мўлжалланган йўловчи терминалига эга.
Жиззахда Зомин аэропорти фойдаланишга топширилди. Бу ҳақда вилоят ҳокимлиги хабар қилмоқда.
“Президентимиз ташаббуси билан амалга ошаётган ушбу лойиҳанинг амалга оширилиши Зомин аҳолиси даромадининг кўпайишига ва ёшлар бандлигини таъминлашга хизмат қилади. Зеро лойиҳа ортидан маҳаллий аҳоли ишлаб, даромад топадиган кўплаб инфратузилмалар, жумладан, умумий овқатланиш, транспорт, сувенирлар, ресторанлар, кафелар ва бошқа хизмат кўрсатиш турлари ривожлантирилади”, - дея таъкидлади вилоят ҳокими Эргаш Салиев.
“Tres 001” қурилиш ташкилоти томонидан бунёд этилган Зомин аэропорти 30 ўринга мўлжалланган йўловчи терминалига эга бўлиб, қуриш учун 60 гектар ер майдони ажратилган.
Объектда жами 200 дан зиёд ходимлар ва 110 та техникалар билан ишлар олиб борилмоқда.
Шунингдек, ҳозирда аэропорт инфратузилмаси, муҳандислик коммуникацияси, учиш-қўниш, ҳаракатланиш йўлаклари ва перронни лойиҳалаш ҳамда қурилиш, учиш ва қўнишни таъминлаш бўйича радио ва аэронавигация ускуналарини харид қилиш, ўрнатиш ва эксплуатация қилиш ишлари белгиланган режа асосида олиб борилмоқда.
Маълумот учун: 2022 йилнинг октябрь ойидан бошлаб Зоминнинг Даштобод шаҳарчаси темир йўл бекатига “Афросиёб” тезюрар поезди тўхташи ташкил этилган эди.
