Улуғбек Рашитов тарихий натижа қайд этди
У кетма-кет 2 бор Гран-При туркумидаги мусобақалар чемпионига айланди.
Ўзбекистонлик таэквондочи Улуғбек Рашитов Париж Гран-Приси чемпиони бўлди. Бу ҳақда Ўзбекистон таэквондо WT ассоциацияси хабар берди.
Кеча, 2 сентябрь куни -68 кг вазн тоифасида терма жамо аъзоси Улуғбек Рашитов Франция пойтахти Парижда старт олган Гран-При турнири ғолибига айланди.
У иштирокини 1/16 финал босқичида габонлик Амир Сиссе Муссага қарши жангдан бошлади. Илк жангни осонлик билан якунлаган Улуғбек нимчорак финалда чилилик Игнасио Моралесни, чорак финалда хитойлик Юшуаи Лиангни, ярим финалда эса хорватиялик Марко Голубични ортиқча қийинчиликсиз мусобақадан чиқариб юборди.
Финал беллашувда эса Рашитов бразилиялик Эдивал Понтесга ҳеч қандай имкон қолдирмади.
“Улуғбек яна бир тарихий натижани қайд этди. Яъни ҳамуртимиз кетма-кет икки бор Гран-При туркумидаги мусобақалар чемпионига айланган илк ўзбек таэквондочисига айланди”, дейилади хабарда.
