Пахта терими нархлари рад этилди
Қишлоқ хўжалиги вазирлиги расмий баёнот билан чиқди.
Қишлоқ хўжалиги вазирлиги ижтимоий тармоқларда “Пахта терими учун янги тўлов нархлари эълон қилинди” сарлавҳаси остида тарқалган хабарларга муносабат билдирди.
"Пахта терими учун тўлов нархлари ҳар йили мавсум бошланиши муносабати билан, муайян бир муддатда белгиланади ва бозор тамойилларини ҳисобга олган ҳолда ҳукумат томонидан тасдиқланади. Теримнинг ҳар бир тури учун алоҳида сумма белгиланади, сўнг барча ОАВ орқали эълон қилинади.
Айни кунларда пахта теримига нарх белгилаш бўйича ишлар вазирликлар билан келишув жараёнида. Бунда унинг биринчи ва иккинчи терими учун (навларини ҳисобга олиб) қанча нарх белгиланиши аниқ кўрсатилади.
Хулоса сифатида шуни айтиш мумкинки, ҳозирги тарқалган хабарлар ҳақиқатга тўғри келмайди", — дейилади вазирлик муносабатида.
